Министерството за образование и наука очекува по завршувањето на вториот уписен рок најголем дел од предвидените места во средните училишта низ државата да бидат пополнети. Според податоците со кои располага ресорното министерство, по првиот уписен рок во средно образование се запишале околу 14.500 ученици, а со вториот се очекува бројката да се зголеми за уште околу две илјади.
Сепак, уписната политика повторно го отвори прашањето за интересот кај учениците за одредени стручни профили. Најизразен е случајот со земјоделското училиште во Битола, каде во прва година се пријавиле само тројца ученици, што според Министерството е недоволно за формирање паралелка.
Министерката за образование и наука Весна Јаневска оцени дека образовната установа не направила доволно во делот на промоцијата и привлекувањето на идните средношколци. Таа најави дека од следната учебна година наставата по земјоделската струка ќе биде организирана во Регионалниот центар во Битола, каде во изминатиот период се инвестирани значителни средства во современа опрема и услови за практична настава.
Од Министерството појаснуваат дека не станува збор за згаснување на земјоделското образование, туку за негова реорганизација со цел подобро искористување на капацитетите и обезбедување поквалитетна обука за учениците. Постојните средношколци ќе продолжат со наставата без промени, додека новозапишаните ќе бидат насочени кон други образовни профили.
Случајот со битолското земјоделско училиште уште еднаш ја отвора дилемата за усогласеноста на средното стручно образование со интересите на учениците и потребите на пазарот на трудот, но и за потребата од поактивна промоција на дефицитарните струки во земјата.
