Британската метеоролошка служба Met Office предупредува дека природниот климатски феномен Ел Нињо, кој моментално се развива над Тихиот Океан, би можел да стане еден од најсилните во модерната историја.
Експертите предупредуваат дека комбинацијата од силен Ел Нињо и климатските промени предизвикани од човекот може дополнително да ги зголеми глобалните температури и ризикот од екстремни временски услови.
Според Met Office, постои голема веројатност 2027 година да стане најтоплата година откако се вршат инструментални мерења. Научниците веќе забележуваат промени во временските обрасци во различни делови од светот, вклучително и отстапувања во монсунските врнежи во Индија и променета активност во Атлантикот.
„Во нашите прогнози никогаш досега не сум видел сигнал за Ел Нињо со ваков интензитет“, изјавил професорот Адам Скиф, кој ги предводи долгорочните прогнози во Met Office.
Ел Нињо е природен климатски феномен кој обично се појавува на секои две до седум години и трае околу една година. При неговото развивање, пасатите над Тихиот Океан ослабуваат или го менуваат правецот, овозможувајќи топлата вода да се придвижи кон источниот дел на океанот.
Топлината од океанот потоа се ослободува во атмосферата, што може да доведе до раст на глобалните температури и значителни промени во распоредот на врнежите.
Моменталните температури на површината на клучниот дел од Тихиот Океан се повеќе од два степени Целзиусови над просекот, а прогнозите укажуваат дека отстапувањето би можело да надмине и три степени.
Научниците посочуваат дека дополнителна енергија доаѓа од исклучително топлите слоеви на океанот. На одредени места, на длабочина од околу 100 метри, температурите се дури осум степени над нормалата. Оваа топла вода претставува своевиден резервоар кој може дополнително да го засили феноменот.
Последиците би можеле да се почувствуваат на повеќе континенти. Австралија би можела да се соочи со поголем ризик од суши и шумски пожари, додека во Перу, Еквадор и јужните делови на САД може да се зголеми опасноста од поплави.
Ел Нињо може да влијае и врз сезоната на урагани, монсуните и временските услови во Европа. Во Велика Британија и северозападна Европа се очекуваат поголеми шанси за влажна и бурна есен, додека подоцна во зимата можни се и периоди со постудено време.
Климатолозите предупредуваат дека не постојат два целосно исти настани на Ел Нињо, па затоа точните последици тешко можат да се предвидат. Сепак, доколку актуелните прогнози се остварат, светот би можел да се соочи со исклучително силен климатски феномен.
Дополнителна загриженост предизвикува можноста Ел Нињо да влијае врз земјоделството и снабдувањето со храна. Обединетите нации веќе предупредија дека силниот феномен би можел да ги загрози милиони луѓе во земјите кои се особено ранливи на суши, поплави и нарушувања во производството на храна.
Научниците сè уште внимателно го следат развојот на феноменот, но едно е јасно – доколку Ел Нињо продолжи да се засилува според најекстремните прогнози, неговото влијание би можело да се почувствува ширум светот.
