Судењето на Линдзи Кленси, обвинета за убиство на нејзините три деца во Масачусетс, е поништено откако поротата не успеала да донесе едногласна одлука за нејзината кривична одговорност.
Судијата Саливан ја распуштил поротата по речиси една недела разгледување на случајот. Поротниците во неколку наврати го известиле судот дека не можат да постигнат договор, а последниот обид за продолжување на расправата не донел промена.
„Во овој момент прогласувам дека поротата не може да донесе одлука и го поништувам судењето“, изјавил судијата.
Одлуката не значи дека Кленси е ослободена, ниту пак дека е прогласена за виновна. Таа и понатаму останува во притвор под истите обвиненија, а е сместена во психијатриска установа.
Следното рочиште е закажано за 29 септември, кога обвинителството треба да одлучи како ќе продолжи постапката. Меѓу можностите се ново судење или евентуален договор со обвинетата.
Кленси е обвинета дека во 2023 година ги убила своите три деца – петгодишната Кора, тригодишниот Досон и осуммесечниот Калан, во семејниот дом во Масачусетс. По нападот врз децата, таа се повредила со нож и скокнала од прозорец, при што останала неподвижна.
Таа не го негира фактот дека ги убила децата, но не се изјаснува како виновна по трите точки за убиство. Нејзината одбрана тврди дека во тој период страдала од постпородилна психоза и дека поради психичката состојба не може да биде кривично одговорна за своите постапки.
Во текот на советувањето на поротата се случил и дополнителен пресврт. Адвокатот на Кленси, Кевин Редингтон, побарал еден од поротниците да биде отстранет, откако останатите членови на поротата навеле дека тој не ги почитува упатствата поврзани со стандардот на „основано сомневање“.
Судијата го одбил барањето и наредил поротата повторно да продолжи со работа. Но, само околу еден час подоцна, поротниците повторно известиле дека не можат да постигнат едногласна одлука.
Одбраната потоа побарала итна интервенција од Врховниот суд на Масачусетс, со барање поротата да продолжи со советувањето и спорниот поротник да биде дополнително испитан. Барањето било одбиено, со што се создале услови за официјално поништување на судењето.
Постапката траела околу шест недели, додека поротата поминала повеќе од 40 часа во советување во текот на седум дена.
Окружниот обвинител Тимоти Круз изјавил дека обвинителството веднаш нема да донесе одлука за следниот чекор и дека ќе се консултира со својот правен тим.
„Факт е дека Линдзи Кленси ги убила своите три деца. Доказите ни покажуваат дека ги контролирала своите постапки кога ги извршила убиствата“, изјавил Круз.
Случајот привлече огромно внимание во САД и отвори широка јавна дебата за постпородилната психоза и кривичната одговорност во случаи кога мајката има сериозни психички нарушувања. На судењето присуствувале голем број новинари, а случајот предизвикал реакции и од американскиот претседател Доналд Трамп.
Трамп случајот го опиша како „ужасна трагедија“ и изјави дека очекува можност за ново судење.
