Легендарниот капитен на Манчестер Јунајтед, Рој Кин, без никаква воздржаност го коментираше случајот со Манчестер Сити и финансиските прекршувања за кои клубот беше прогласен за одговорен од независна комисија на Премиер лигата.
Кин порача дека доколку бил на местото на фудбалерите кои ги освоиле трофеите во периодот опфатен со истрагата, не би сакал да ги задржи медалите. Според него, доколку титулите биле освоени со прекршување на правилата, медалите би завршиле во канта за отпадоци.
Премиер лигата објави дека истрагата утврдила сериозни финансиски прекршувања од страна на Сити во периодот од 2009 до 2018 година. Според заклучоците, клубот користел комерцијални договори кои биле лажно прикажувани или прикривани, со што биле зголемувани приходите и намалувани прикажаните трошоци. Вкупната вредност на спорните финансиски неправилности се проценува на околу 1,05 милијарди евра.
Токму поради тоа, Кин остро го нападна начинот на кој биле освојувани трофеите.
„Да бев фудбалер, сто проценти би ги фрлил медалите во ѓубре. Тоа е мамење. Ако сте ги освоиле трофеите на теренот затоа што сте мамеле, тогаш тоа е проблем“, порача Кин.
Во периодот кој е предмет на постапката, Манчестер Сити освои осум големи трофеи. Случајот, според Кин, може да остави последици и врз сегашната генерација во клубот, бидејќи ваквите случувања влијаат врз имиџот и атмосферата околу тимот.
Манчестер Сити, сепак, ги отфрла заклучоците на комисијата и најави жалба. Од клубот порачаа дека се разочарани и изненадени од одлуката и дека сметаат оти во неа има сериозни грешки во примената на правото, фактите и принципите.
Премиер лигата дополнително го обвини Сити дека не соработувал целосно со истрагата која траела четири години и дека на различни начини се обидувал да го отежне нејзиното спроведување.
Конечната казна за Манчестер Сити сè уште не е утврдена. Раководството на Премиер лигата случајот го опиша како еден од најзначајните дисциплински процеси во историјата на натпреварувањето, а постапката продолжува со утврдување на преостанатите мерки.
