Две лица го загубија животот откако мал авион „Цесна 210“ се урна непосредно по полетувањето од аеродромот Пачука, во мексиканската сојузна држава Идалго.
Несреќата се случила околу 9:30 часот по локално време, само една минута откако леталото полетало кон меѓународниот аеродром Куернавака во државата Морелос. Авионот паднал на авенијата Тезонтле, во населбата Вента Приета, на околу 500 метри од пистата, надвор од аеродромскиот простор.
Според мексиканските воздухопловни власти, во леталото се наоѓале две лица и ниту едно не ја преживеало несреќата. На местото веднаш пристигнале аеродромски служби и екипи за итни интервенции.
Покрената е истрага за утврдување на причините за падот. Засега не се објавени идентитетите на загинатите, ниту е познато дали несреќата била предизвикана од технички дефект или друг фактор. Не се соопштени ниту информации за евентуална штета на околните објекти.
