Шпанија убедливо ја совлада Хрватска со 4:1 во Севилја, а селекторот Луис де ла Фуенте по натпреварот истакна дека неговите фудбалери можеле да имаат уште поголема предност уште во првото полувреме.
Според шпанскиот селектор, играта на неговата репрезентација можела да донесе и резултат од 5:1 по првите 45 минути. Тој побарал од своите фудбалери максимална концентрација во секој момент од натпреварот и нагласил дека тимот мора да ја контролира играта кога ја има топката.
Де ла Фуенте бил особено задоволен од начинот на кој неговите избраници ги решавале ситуациите на теренот, истакнувајќи дека ужива во нивниот пристап и желбата постојано да напредуваат.
Посебни пофалби упати и за атмосферата во Севилја. Селекторот се заблагодари за пречекот и поддршката од трибините, оценувајќи дека атмосферата на стадионот била одлична и дека неговите играчи возвратиле со убедлива претстава.
Големо внимание по натпреварот повторно привлече Ламине Јамал, кој постигна два гола. На прашањето за неговите шанси во борбата за „Златната топка“, Де ла Фуенте истакна дека младиот фудбалер има желба да му покаже на светот каков играч е.
Селекторот посочи дека Јамал со своите индивидуални квалитети носи голема вредност, но истовремено знае да ги стави своите способности во служба на целиот тим. Според него, иднината ќе покаже колку големо место ќе има младиот фудбалер во светскиот фудбал.
