Киев повторно беше цел на руски ракетен напад во раните утрински часови во саботата, при што беа оштетени станбени објекти, детска градинка и важна сообраќајна инфраструктура. Според првичните информации од украинските власти, во нападот има повредени лица, а дел од градот се соочуваше и со прекини во сообраќајот поради оштетувањето на еден од мостовите.
Градоначалникот на Киев, Виталиј Кличко, соопшти дека руските сили употребиле балистички ракети за напад врз инфраструктурни цели во главниот град. На социјалните мрежи тој информираше за експлозии во предградијата и оштетувања предизвикани од остатоци од ракетите.
Според неговите информации, делови од проектил погодиле петкатна станбена зграда во западниот дел на Киев, додека фасадата на уште еден станбен објект исто така била оштетена. Градската воена администрација пријавила и штета на зграда во која се наоѓа детска градинка.
Дополнително, Северниот мост во Киев бил затворен за сообраќај во двата правци поради оштетувања предизвикани од нападот. Надлежните служби излегле на терен за да ја утврдат состојбата на конструкцијата и да проценат дали мостот е безбеден за повторно користење.
