На 1 септември 1985 година, по повеќе од 70 години од најпознатата поморска трагедија, истражувачите ја открија олупината на „Титаник“ во северниот дел на Атлантскиот Океан.
Откритието било резултат на заедничка американско-француска експедиција предводена од Роберт Балард и Жан-Луј Мишел. Со помош на специјална подводна опрема, тимот успеал да го лоцира бродот на длабочина од околу 3.800 метри.
„Титаник“ потонал на 15 април 1912 година, по удар во санта мраз за време на своето прво патување од Саутемптон кон Њујорк. Во трагедијата животот го загубиле повеќе од 1.500 луѓе.
Пронаоѓањето на олупината било историски момент за океанографијата и овозможило детално истражување на остатоците од бродот, кој и денес останува симбол на една од најпознатите катастрофи во историјата.
