Силна експлозија утрово го потресе центарот на Атина, при што делумно се урна стара двокатна зграда во туристичкиот кварт Плака, во близина на Акрополот. Инцидентот предизвика голема реакција на надлежните служби, а според првичните информации има лесно повредени лица.
Експлозијата се случила околу 7:30 часот на улицата Лисикратус. Од силниот удар бил оштетен објектот, а урнатини паднале и врз околните автомобили и соседни објекти.
Првичните информации упатуваат дека можна причина е истекување на природен гас, но надлежните служби сè уште ги утврдуваат точните околности и причината за експлозијата. На местото било забележано и мало жариште на пожар, кое брзо било ставено под контрола.
Грчката противпожарна служба и спасувачките екипи веднаш пристигнале на местото. Во текот на акцијата биле спасени две жени од соседна зграда, додека едно лице било лесно повредено од парчиња и урнатини.
На терен биле ангажирани пожарникари, специјализирани спасувачки екипи и механизација, а полицијата го обезбедила просторот и вовела сообраќајни ограничувања.
Плака е една од најстарите и најпосетувани населби во Атина и се наоѓа во непосредна близина на значајни туристички знаменитости, поради што инцидентот привлече големо внимание.
Истрагата за причините за експлозијата продолжува, а надлежните проверуваат дали во оштетената зграда имало уште лица.
