Нова група од 25 лица ќе биде ослободена од затворите во Белорусија по договор постигнат меѓу властите во Минск и претставник на американската администрација. Во рамките на договорот, САД се очекува да ги укинат санкциите кон две белоруски компании.
Белорускиот претседател Александар Лукашенко и американскиот специјален пратеник Џон Коул разговарале за продолжување на процесот на ослободување на затвореници. Според информациите од белоруските власти, договорот е привремен и предвидува ослободување на 25 лица.
Организацијата за човекови права „Вјасна“, која во Белорусија е забранета, објави дека дел од семејствата веќе биле информирани да дојдат по своите блиски од казнените установи.
САД во изминатиот период започнаа директни разговори со Лукашенко, кој е близок сојузник на рускиот претседател Владимир Путин. Како дел од дипломатскиот процес, Вашингтон постепено ги ублажува одредени санкции кон Белорусија, паралелно со ослободувањето на лица од затвор.
Од „Вјасна“ тврдат дека во белоруските затвори сè уште се наоѓаат повеќе од 900 лица кои ги сметаат за политички затвореници. Според организацијата, меѓу обвиненијата против нив се наведуваат екстремистички активности, обиди за преземање на власта, поттикнување омраза и навредување на претседателот.
Коул, кој е вклучен во разговорите со Минск од минатата година, досега учествувал во преговори што резултирале со ослободување на стотици затвореници.
Лукашенко, сепак, не прифаќа дека лицата ослободени или затворени по политички основи се „политички затвореници“. Тој ги отфрла и обвинувањата на опозицијата во егзил и организациите за човекови права дека белоруските власти продолжуваат со апсења на нови лица, и покрај ослободувањето на дел од претходно затворените.
