Фудбалскиот клуб Бордо се наоѓа пред промена на сопственикот која би можела да го спаси од ликвидација. На Трговскиот суд во Бордо е објавен договор според кој славниот француски клуб треба да биде продаден за симболична сума од само едно евро.
Договорот, според повеќе извори, го постигнале претставници на актуелниот сопственик Жерар Лопез и компанијата „Парк Бенч“. Трансакцијата се очекува да биде важен чекор во обидот клубот да ја надмине тешката финансиска криза и да продолжи да функционира.
Бордо, кој во својата историја шестпати бил француски шампион, во последните години доживеа голем пад. По финансиските проблеми и административното исфрлање од професионалните натпреварувања, клубот се најде во регионалните лиги и денес се натпреварува во Régional 1, далеку од елитното француско првенство.
Само четири години по испаѓањето од Лига 1, еден од најпознатите француски клубови се најде во шестото ниво на натпреварување, што претставува драматичен пад за тим со богата традиција.
Најголем проблем во изминатиот период биле огромните финансиски загуби и наталожените долгови. Испаѓањето од Лига 1 дополнително ја влошило состојбата поради значителното намалување на приходите, особено од телевизиските права.
Француските финансиски и спортски тела во повеќе наврати изразувале сомнеж дали клубот располага со доволно средства за да ја заврши сезоната, поради што Бордо постепено бил преместуван во пониски рангови.
Клубот во текот на летото интензивно бараше решение за финансиската криза. На крајот на јули, инвестицискиот фонд „Спарта Капитал“ ги презеде уделите на досегашниот сопственик Жерар Лопез за симболична сума од едно евро.
Новиот договор сега отвора можност Бордо да избегне ликвидација и да продолжи со работа, со надеж дека во следниот период ќе успее финансиски да се стабилизира и постепено да се врати кон повисоките рангови на францускиот фудбал.
