Жителите, доброволните и професионалните пожарникари заеднички го запреле огнот пред да стигне до домовите
Вознемирувачка ноќ имале жителите на Зелениково, откако пожар што избувнал на ридот над селото во текот на ноќта се проширил кон населеното место и се доближил до куќите.
Според информациите што ги сподели директорот на Дирекцијата за заштита и спасување, Стојанче Ангелов, критичната ситуација се случила околу 2 часот по полноќ. Тој добил повик од жителка која била видно вознемирена и побарала итна помош, бидејќи пламените јазици се движеле кон нејзиниот дом.
За пожарот веднаш била известена скопската противпожарна служба, по што возило од станицата во Драчево било испратено кон Зелениково.
Во акцијата се вклучила и локалната самоуправа. Градоначалникот на Општина Зелениково, Коста Маневски, веднаш го активирал општинското противпожарно возило и се упатил кон делот од населеното место кој бил најзагрозен.
На терен пристигнале и доброволните пожарникари од Зелениково, кои заедно со професионалните екипи започнале со локализирање на пожарот.
Важна улога имале и самите жители. Тие со вода ги заштитувале куќите, а воедно расчистувале делови од вегетацијата во близина на објектите за да го спречат огнот полесно да се прошири.
Со координирана акција, огнот бил ставен под контрола пред да ги зафати првите куќи. Според досегашните информации, нема пријавено оштетени или изгорени домови.
Ангелов упати благодарност до сите кои се вклучиле во интервенцијата, посебно до жителите, доброволните пожарникари, локалната самоуправа и професионалните пожарникари од Скопје.
Воедно, најавено е продлабочување на соработката со доброволното противпожарно друштво од Зелениково. Неговите членови ќе бидат вклучени во Тимовите за брз одговор на ДЗС, а планирано е да добијат дополнителна заштитна и противпожарна опрема.
По успешната интервенција, пожарот бил ставен под контрола, но надлежните повторно апелираат на внимателност поради високата опасност од ширење на пожари.
„Доволна е само една искра за да се предизвика вистинска катастрофа“, предупреди Ангелов.
