НУ Драмски театар Скопје денеска и утре гостува во Будва со претставата „Животот на провинциските плејбоји по Втората светска војна или Туѓото го сакаме – своето не го даваме“.
Претставата е во режија на Иван Пеновиќ, според текст на Душан Јовановиќ, а ќе се игра на отворената сцена „Помеѓу црквите“ во Стариот град, со почеток во 21 часот.
Станува збор за регионална копродукција во која учествуваат Драмски театар Скопје, Белградско драмско позориште, Местно гледалишче од Љубљана и „Град театар“ од Будва. Во актерската екипа се застапени уметници од повеќе земји од регионот.
Фестивалот „Град театар“ годинава го одбележува 40-годишниот јубилеј и во текот на фестивалските денови нуди богата програма со повеќе од 60 претстави и настани од драмската, музичката, ликовната и книжевната уметност.
Претставата на Драмски театар веќе има богато фестивалско искуство. По премиерата, таа беше прикажана на „Охридско лето“, на Бриони во Хрватска, како и на повеќе настани во рамките на регионалната театарска мрежа РУТА.
Гостувањето во Будва претставува уште една можност македонската театарска продукција да се претстави пред регионалната публика и да ја продолжи соработката со значајни културни институции од Балканот.
