Американскиот претседател Доналд Трамп го назначи Адам Теле за вршител на должноста секретар на американската копнена војска, откако досегашниот секретар Ден Дрискoл поднесе оставка претходно оваа недела.
Теле досега ја извршуваше функцијата помошник секретар на копнената војска за цивилни прашања, на која беше поставен во август 2025 година. Трамп при назначувањето го опиша како „голем патриот“ и човек кој ужива голема почит.
Оставката на Дрискoл доаѓа по повеќемесечни несогласувања со секретарот за одбрана Пит Хегсет. Според извор запознаен со случувањата, Дрискoл ги информирал претставниците на Белата куќа за своето заминување.
Во центарот на несогласувањата наводно биле прашањата поврзани со модернизацијата и подготвеноста на американската армија. Дрискoл сметал дека одредени иницијативи за трансформација на копнените сили биле блокирани, вклучително и преку смената на генерали кои биле задолжени за нивно спроведување.
Сè уште не е целосно јасно дали оставката на Дрискoл формално била прифатена од Белата куќа. Американската армија засега не даде официјален коментар за информациите.
Дрискoл беше потврден на функцијата во февруари 2025 година и во својот мандат се залагаше за значително побрза и пофлексибилна набавка на вооружување. Посебно внимание посветуваше на поевтини системи и на намалување на зависноста од големите производители на оружје.
Една од неговите главни теми беше модернизацијата на армијата преку поширока употреба на дронови и други современи технологии. Поради неговото залагање за брзо воведување на беспилотни системи, во американските воени кругови често беше опишуван како „Трамповиот човек за дронови“.
Според неименуван американски функционер, Хегсет го гледал Дрискoл како внатрешна пречка во Пентагон и подолг период сакал да го отстрани од функцијата. Неговите блиски односи со потпретседателот Џеј Ди Венс, според истиот извор, го отежнувале таквиот потег.
Дрискoл претходно привлече внимание и со улога надвор од воениот ресор. Трамп го вклучи во дипломатските напори поврзани со преговорите меѓу Москва и Киев за ставање крај на војната во Украина, што претставуваше необична задача за еден секретар на копнената војска.
Назначувањето на Теле се случува во период на сериозни безбедносни предизвици за САД и додека илјадници американски војници се распоредени на Блискиот Исток. Промената на врвот на копнената војска дополнително го насочува вниманието кон односите и поделбите во американскиот одбранбен апарат.
