Голем пожар избувна рано утрово во трговски објект на улицата „Индира Ганди“ во Шуто Оризари, при што се опожарени повеќе од 20 дуќани. Во инцидентот нема повредени, но причинета е значителна материјална штета.
Огнот избувнал околу 3:20 часот, а според информациите на надлежните, сите опожарени дуќани биле во сопственост на едно лице и биле издадени под закуп.
Во интервенцијата учествувале 15 пожарникари со шест противпожарни возила. Екипите започнале со гаснење во 3:31 часот, а пожарот бил ставен под контрола по повеќе од три часа, околу 6:45 часот.
Засега не е познато што го предизвикало пожарот. Од МВР најавија дека ќе биде извршен увид на местото и ќе се преземат дополнителни мерки за утврдување на причините и расчистување на случајот.
Интензитетот на пожарот предизвикал голема штета во трговскиот објект, а надлежните служби продолжуваат со постапките за утврдување на сите околности поврзани со инцидентот.
