Кинеските власти воведоа четврто ниво на вонредна состојба во провинциите Џеџијанг и Фуџијан поради заканата од силен тајфун и можни поплави, соопшти Министерството за управување со вонредни состојби.
Според надлежните институции, мерките се преземени превентивно за да се намалат ризиците по населението и инфраструктурата, а степенот на подготвеност ќе се менува во зависност од развојот и движењето на невремето.
Метеоролошките служби информираат дека центарот на супртајфунот Бави се наоѓал околу 1.490 километри југоисточно од Килунг на островот Тајван. Се очекува системот да продолжи да се движи кон запад, а потоа да сврти кон северозапад со брзина меѓу 15 и 20 километри на час.
Според актуелните прогнози, тајфунот би можел во сабота навечер да го погоди крајбрежјето меѓу градот Фуќинг во провинцијата Фуџијан и градот Венлинг во провинцијата Џеџијанг, со јачина на силен тајфун.
Локалните власти веќе ги мобилизираат службите за итни интервенции, ги следат водостоите на реките и подготвуваат евентуални евакуации доколку временските услови дополнително се влошат. Граѓаните се повикани внимателно да ги следат официјалните предупредувања и да избегнуваат движење во ризичните подрачја.
