Министерката за енергетика, рударство и минерални суровини, Сања Божиновска, денеска ќе се соочи со интерпелација во Собранието, поднесена од пратениците на Левица. На 128. седница пратениците ќе расправаат за нејзината работа, при што главните забелешки на подносителите се однесуваат на состојбите во енергетскиот сектор и задолжувањата поврзани со државниот енергетски систем.
Од Левица сметаат дека во изминатиот период не се постигнати очекуваните резултати во енергетиката и токму тоа го наведуваат како една од причините за барањето за гласање недоверба на министерката. Партијата ги повикува и останатите политички субјекти да ја поддржат интерпелацијата.
Освен расправата за работата на Божиновска, на дневниот ред на седницата се наоѓаат и повеќе законски предлози и одлуки поврзани со функционирањето на институциите. Пратениците треба да разгледаат предлог за избор на член на Судскиот совет на Република Северна Македонија, како и предлог-одлуки за именување член на Републичкиот совет за безбедност на сообраќајот на патиштата и член на Управниот одбор на Агенцијата за цивилно воздухопловство.
Во собраниската процедура се и измените и дополнувањата на Законот за јавните набавки, кои се разгледуваат во второ читање, како и дополнетиот предлог за измени на Законот за животната средина, исто така во второ читање. На пратениците ќе им биде претставен и предлог-законот за измени и дополнувања на Законот за приватизација и закуп на градежно земјиште во државна сопственост, кој е во прво читање.
Дел од седницата е посветен и на прашањата поврзани со заштитата на децата и нивните права. Пред пратениците ќе се најде годишниот извештај за работата на Државниот совет за превенција на детско престапништво и правда за деца, кој ги опфаќа состојбите во оваа област во текот на 2025 година.
На дневниот ред е и предлог-законот за изменување на Законот за аудио и аудиовизуелни медиумски услуги, во прво читање. Пратениците ќе треба да ја разгледаат и предлог-одлуката за изменување на одлуката со која е одобрено продолжување на рокот за постоење кризна состојба на дел од територијата на државата.
Седницата опфаќа повеќе политички, законодавни и институционални прашања, но во фокусот ќе биде интерпелацијата за министерката Божиновска и аргументите на Левица за нејзината работа во енергетскиот сектор.
