Легендарната американска кошаркарка Лиса Лесли доби големо признание за својата кариера, откако во неделата пред „Crypto.com Arena“ во Лос Анџелес беше откриен нејзиниот споменик. Со тоа, таа стана првата кошаркарка од ВНБА која добила статуа на оваа локација.
Во нејзина чест беше организирана и посебна церемонија за време на полувремето на натпреварот, на која присуствуваа бројни познати спортски имиња од Лос Анџелес.
Лесли целата своја професионална кариера во ВНБА ја мина во дресот на Лос Анџелес Спаркс, од 1997 до 2009 година. Со тимот освои две последователни шампионски титули, во 2001 и 2002 година, а трипати беше прогласена за најкорисна кошаркарка во лигата.
Во 2015 година беше примена во „Најсмит Меморијал“ Кошаркарската куќа на славните, со што дополнително го потврди своето место меѓу најзначајните имиња во историјата на овој спорт.
Лесли остана запаметена и како првата жена која забила на натпревар во ВНБА. Тоа го направи во 2002 година, поставувајќи уште еден историски момент во женската кошарка.
Кариерата ја заврши со просек од 17,3 поени, 9,1 скок и 2,4 блокади по натпревар. Со репрезентацијата на САД освои четири олимписки златни медали, како и две златни и една бронзена медалa на светските првенства.
Говорејќи за споменикот, Лесли истакна дека сакала тој да ја претставува нејзината борбеност и натпреварувачки дух, но истовремено и нејзината женственост.
„Сакав оваа статуа да биде совршена комбинација од неустрашивоста и натпреварувачкиот дух што ги имав, што ги имам и што секогаш ќе ги имам“, порача Лесли.
Таа се присети и на начинот на кој секогаш ја истакнувала својата женственост, носејќи ленти и средувајќи ги ноктите, бидејќи не сакала никој да ја поврзува нејзината спортска борбеност со тоа дека се откажува од својата женственост.
Новата статуа на Лиса Лесли сега стои во друштво на спомениците на некои од најголемите спортски легенди поврзани со Лос Анџелес, меѓу кои се Меџик Џонсон, Коби Брајант, Шекил О’Нил и Вејн Грецки.
