Патувањето на македонските граѓани во Шенген зоната во иднина ќе бара уште една задолжителна процедура. Покрај новиот систем за регистрација на влез и излез, Европската Унија ќе воведе и ETIAS – електронска патна авторизација за државјани на земји кои имаат безвизен режим со ЕУ.
За добивање на ETIAS одобрение ќе се поднесува онлајн апликација, а предвидената такса изнесува 20 евра. Од плаќање ќе бидат ослободени лицата под 18 и над 70 години, но и тие ќе мора да поднесат барање и да добијат одобрение пред патувањето.
Авторизацијата ќе биде дигитално поврзана со пасошот и ќе важи до три години, или пократко доколку пасошот истече порано. Со едно одобрение ќе може да се патува повеќепати, но и понатаму ќе важи ограничувањето од најмногу 90 дена престој во рамки на 180 дена.
Важна промена е и обврската за превозниците. Авиокомпаниите и другите превозници ќе треба да проверат дали патникот има валидно ETIAS одобрение пред да започне патувањето. Без него, патникот може да не биде пуштен да се качи во превозното средство.
При аплицирањето ќе се внесуваат лични податоци, информации од пасошот и одговори на безбедносни прашања. Податоците потоа ќе се проверуваат преку европските информациски системи.
ETIAS не треба да се меша со EES. Првиот систем служи за добивање претходно електронско одобрение пред патување, додека EES е систем преку кој се регистрираат влезовите и излезите од Шенген, вклучително и биометриски податоци.
И со одобрена ETIAS авторизација, влезот во ЕУ не е автоматски гарантиран. Конечната одлука останува кај граничните службеници.
Затоа, граѓаните кои планираат патување во Шенген зоната ќе треба навреме да ја завршат постапката и пред патувањето да проверат дали нивното одобрение е важечко.
