Јувентус ја одигра генералната проба пред почетокот на новата сезона, но натпреварот против резервниот тим Јувентус Некст Џен заврши на необичен начин. Наместо планираното второ полувреме, теренот во Торино беше преплавен од навивачи кои влетаа на игралиштето за да се доближат до своите омилени фудбалери.
До паузата, првиот тим на Јувентус имаше предност од 2:0. Головите ги постигнаа Франсиско Консеисао и Вестон Мекени, додека меѓу најзабележителните играчи во првите 45 минути беа Даглас Луиз и Кенан Јилдиз.
Тренерот Лучијано Спалети на полувремето направи целосна промена на составот, заменувајќи ги сите 11 стартери. Сепак, новиот состав воопшто не доби можност да го одигра вториот дел.
Навивачите масовно влегоа на теренот и за кратко време го исполнија целото игралиште. Голем дел од нив се обидуваа да стигнат до фудбалерите и членовите на стручниот штаб за да побараат дресови и фотографии.
Во хаосот се случи и момент кој можеше да има сериозни последици. Дефанзивецот на Јувентус и италијански репрезентативец Федерико Гати беше соборен од навивач кој му налета одзади.
Според италијанските медиуми, навивачот најверојатно се лизнал додека трчал по теренот и со полна брзина удрил во Гати. Фудбалерот во тој момент се движел кон излезот, додека поголемиот дел од неговите соиграчи веќе се упатувале кон соблекувалните.
Ударот бил од таков интензитет што Гати можел да биде сериозно повреден, особено имајќи предвид дека навивачот му пришол одзади и во близина имало уште други лица.
За среќа, дефанзивецот поминал без сериозна повреда. Сепак, инцидентот повторно го отвори прашањето за безбедноста на теренот и контролата на навивачите за време на ваквите натпревари.
Планираното второ полувреме на крајот не се одигра. Натпреварот остана запаметен не толку по резултатот, колку по масовната инвазија на навивачите и опасниот момент во кој Гати за малку можеше да заработи сериозна повреда.
