Бредли Бил останува член на Лос Анџелес Клиперси, откако искусниот бек договори нов двегодишен договор вреден 13,2 милиони долари. Информацијата ја потврди неговиот агент Марк Бартелштајн, а договорот вклучува и играчка опција за втората сезона.
Бил претходно ја одби опцијата вредна 5,6 милиони долари и излезе на пазарот на слободни агенти, каде што разгледуваше неколку понуди. Меѓу заинтересираните беше и Мајами Хит, но 33-годишниот кошаркар на крајот одлучи кариерата да ја продолжи во Лос Анџелес.
Одлуката да ја одбие претходната опција му овозможи на Бил да го тестира пазарот, додека Клиперси добија дополнителна финансиска флексибилност при составувањето на тимот. На крајот, тој договори значително подобри финансиски услови.
Трикратниот Ол-стар играч пристигна во Клиперси минатото лето, но поради проблеми со левиот колк одигра само шест натпревари. Потоа мораше да биде опериран, со што неговата сезона беше завршена.
На тие шест натпревари Бил просечно постигнуваше 8,2 поени и 20,2 минути по натпревар, со 36,8 отсто успешност во шутот за три поени. Тоа беа најслабите просеци во неговата НБА кариера.
Бил во следната сезона ќе наполни 33 години и ќе влезе во својата 15. НБА сезона. Во досегашната кариера просечно постигнува 21,4 поени, 4,3 асистенции и 4,0 скока по натпревар, со 37,6 отсто успешност за три поени.
Сепак, откако го напушти Вашингтон Визардс по сезоната 2022/23, Бил ниту еднаш немаше просек од најмалку 20 поени по натпревар.
Клиперси во меѓувреме започнаа процес на реконструкција на тимот, го подмладија составот и го зголемија бројот на пикови на драфтот. Сега останува да се види каква улога ќе има Бил во новиот состав и дали ќе успее да се врати на нивото на игрите со кои своевремено беше еден од најдобрите бекови во НБА.
