Фудбалскиот свет се прости од едно од најголемите имиња во историјата на италијанскиот фудбал. Сандро Маџола, легендарниот напаѓач на Интер и поранешен италијански репрезентативец, почина во Милано на 84-годишна возраст. Веста за неговата смрт ја потврди Интер.
Маџола цели 17 години го носеше дресот на миланскиот клуб, од 1960 до 1977 година. Во тој период остави огромна трага во историјата на „нераѕурите“, со кои освои четири титули во италијанското првенство, двапати Купот на европските шампиони и два Интерконтинентални купа.
Еден од најпаметените моменти во неговата кариера беше финалето на Купот на европските шампиони во 1964 година. Интер го совлада Реал Мадрид со 3:1, а Маџола постигна два гола и беше еден од клучните играчи во историскиот триумф.
За Интер одигра вкупно 565 натпревари и постигна 161 гол. Беше дел од генерацијата на „Grande Inter“, екипата која под водство на легендарниот тренер Еленио Ерера доминираше во европскиот и италијанскиот фудбал во 1960-тите.
Маџола имаше значајна улога и во италијанската репрезентација. За националниот тим настапи 70 пати и постигна 22 гола. Со Италија во 1968 година стана европски шампион, а две години подоцна играше во финалето на Светското првенство во Мексико, каде Италија загуби од Бразил.
Неговиот живот бил обележан и со голема семејна трагедија. Тој бил син на Валентино Маџола, капитенот на славниот Торино, кој загинал во авионската несреќа кај Суперга во 1949 година. Сандро тогаш имал само шест години.
По завршувањето на играчката кариера, Маџола остана присутен во фудбалот преку различни функционерски позиции и како телевизиски коментатор. Со своите настапи и трофеи остана запаметен како една од најзначајните фигури на Интер и на италијанскиот фудбал.
