На сесијата посветена на прашањето дали Европа сè уште има улога на глобален играч, претседателката говореше за европската интеграција на Македонија, состојбите на Западен Балкан и потребата од промени во пристапот кон проширувањето. Самитот се одржува од 27 до 29 септември, а меѓу главните теми се и иднината на проширувањето, безбедноста и економската конкурентност на Европа.
Во своето обраќање, Сиљановска-Давкова се осврна на долгогодишниот европски пат на земјава. Таа посочи дека Македонија повеќе од две децении има кандидатски статус и дека во тој период спровела значаен дел од потребните усогласувања со европското законодавство.
Претседателката оцени дека европската интеграција на Македонија била проследена со низа отстапки и политички условувања. Како пример ги наведе промените на државното име и уставните измени, за кои рече дека биле донесени под надворешен притисок.
Во тој контекст, таа ја отвори и темата за поврзувањето на уставните измени со билатерални и историски прашања. Според неа, ваквиот пристап може да го доведе во прашање принципот според кој напредокот на кандидатите треба да зависи од исполнувањето на европските критериуми.
Сиљановска-Давкова оцени дека јасната перспектива за членство е значајна и за стабилноста на Западниот Балкан, особено во период кога Европа се соочува со сериозни безбедносни и геополитички предизвици.
Таа посочи и на, како што го опиша, несогласувањето меѓу амбицијата на ЕУ да има поголемо влијание во светот и бавниот процес на интеграција на земјите од Западен Балкан.
Како можни насоки за промена на политиката на проширување, претседателката издвојува три принципи. Првиот е напредокот да се темели на исполнетите критериуми и реформските резултати, без дополнителни блокади поврзани со прашања надвор од европските услови.
Вториот се однесува на идното членство и потребата од јасни и еднакви правила за сите земји, додека третата идеја е постепено вклучување на кандидатите во одредени европски политики и механизми уште пред полноправното членство.
Според Сиљановска-Давкова, ваквата постепена интеграција би имала смисла доколку претставува пат кон полноправно членство, а не трајна замена за него.
Нејзиното учество е дел од програмата на 22. Европски самит во Салцбург, кој годинава е посветен на прашањето за Европа како суверен глобален играч.
