На плоштадот Маливелд, во близина на центарот на Хаг, денеска се собраа неколку стотици демонстранти. Според проценките на холандскиот јавен сервис NOS, бројот на присутни во еден момент достигнал околу 300 лица.
Ситуацијата ескалирала кога дел од демонстрантите, од кои голем број биле облечени во црно, почнале да фрлаат пиротехнички средства кон полицијата. Безбедносните сили го блокирале просторот за да спречат групата да се упати кон автопатот А12 или кон центарот на Хаг.
Полицијата употреби воден топ
Протестот бил прекинат откако, според извештаите на холандските медиуми, кон полицајците биле фрлани пиротехнички средства, димни бомби и други предмети.
По ескалацијата, интервентните полициски единици употребиле воден топ за да ја растераат групата.
Околу 14:15 часот градските власти донеле одлука целосно да го распуштат протестот поради продолжувањето на насилните инциденти. Полицијата потоа започнала постепено и контролирано да ги отстранува присутните од Маливелд.
Во меѓувреме биле извршени и првите апсења, но официјалните информации за точниот број на приведени лица сè уште не се објавени.
Маршот бил забранет уште пред протестот
Организаторите на протестот планирале по собирањето на Маливелд да организираат и марш низ улиците на Хаг.
Градските власти, сепак, претходно го забраниле маршот поради безбедносни ризици и проценка дека постои опасност од нарушување на јавниот ред. Како причина било наведено и тоа што дел од учесниците продолжиле да ги кријат лицата.
И покрај забраната за маршот, самиот протест на Маливелд во почетокот бил дозволен.
На протестот имало и крајнодесничарски симболи
На собирот биле забележани знамиња и транспаренти со пораки како „White Pride“, како и т.н. „Prinsenvlag“ – историски холандски знамиња кои денес може да се сретнат и кај дел од крајнодесничарските групи.
Холандските медиуми известуваат и за навредливи пораки насочени кон хомосексуалците, како и за расистички содржини на дел од транспарентите.
Се повторува сценариото од минатата година
Денешните настани се случуваат речиси една година по сериозните нереди за време на сличен антимиграциски протест во Хаг.
Минатата година повеќе од илјада лица се обиделе да се упатат кон А12, по што дошло до жестоки судири со полицијата. Демонстрантите фрлале камења, шишиња и сообраќајна опрема, а биле запалени и полициски возила.
Во нередите биле оштетени објекти во центарот на градот, меѓу кои и канцеларија на холандската партија Д66. Биле уапсени најмалку 30 лица, додека двајца полицајци биле повредени. Пријавени биле и напади врз новинари.
Поради искуството од минатогодишниот протест, холандските власти и овојпат презеле засилени безбедносни мерки. Во Хаг денеска бил најавен и контрапротест на антифашистички групи.
