Поранешниот фудбалер на Хајдук и Осиек, Дарко Нејашмиќ (27), кој моментално настапува како дефанзивен играч за врска во холандскиот НЕЦ Најмеген, стана главна ѕвезда на преодниот рок во Холандија, откако медиумите јавно го поврзаа со трансфер во гигантот Ајакс. Според првичните информации кои брзо се раширија во јавноста, Ајакс наводно подготвил понуда од 6,5 милиони евра фиксно, плус дополнителни 3 милиони евра во бонуси за неговите услуги.
Иако некои холандски медиуми и инсајдери, како новинарот Сандер Јансен, брзо објавија деманти тврдејќи дека во НЕЦ Најмеген сè уште немаат добиено официјална милионска понуда, приказната има сериозна позадина. Познатиот новинар на „Де Телеграф“, Валентијн Дрисен, јавно истакна дека не му е јасно зошто Ајакс веќе не го ангажирал Хрватот, нагласувајќи дека тој е токму профилот на играч на позицијата заден везен кој болно му недостига на клубот од Амстердам.
Нејашмиќ зад себе има фантастична сезона во која беше клучен играч во освојувањето на историското трето место со НЕЦ Најмеген во Ередивизија, а одличната форма ја потврди и во квалификациите за Лигата на шампионите против Олимпијакос, каде беше најдобро оценет играч. Неговиот договор со клубот истекува во јуни 2027 година, а тренерот Дик Шрудер потврди дека веќе се водат преговори за нов договор, порачувајќи дека нема да врши притисок врз фудбалерот кој сам мора да ја донесе најдобрата одлука за својата иднина.
