Винарската визба „Тиквеш“ и годинава оствари значаен успех на престижниот меѓународен натпревар „Decanter World Wine Awards 2026“, освојувајќи вкупно 18 медали и потврдувајќи ја својата позиција меѓу најуспешните винарници од регионот на светската винска сцена.
Во конкуренција на близу 17.000 вина од 58 земји, вината на „Тиквеш“ освоија две златни, пет сребрени и единаесет бронзени признанија, што претставува уште една потврда за континуираниот квалитет и меѓународната конкурентност на македонскиот производител.
Најголем успех на годинашното издание на „Decanter“ постигна црвеното вино „Babuna 2022“, кое беше наградено со златен медал и високи 96 поени, со што се издвои како највисоко оценетото македонско вино на натпреварот. Второто златно одличје го освои „Found Kratosija 2024“, вино произведено за британскиот пазар, кое доби 95 поени од стручната комисија.
Сребрени медали освоија „Luda Mara 2024“, „Bela Voda 2022“, „Babuna 2023“, „Domaine Lepovo Grand Cuvée 2023“ и белото вино „Barovo Fumé Blanc 2025“. Меѓу добитниците на бронзени признанија се најдоа „Bela Voda White 2024“, „Barovo Sauvignon Blanc 2025“, „Bela Voda Red 2021“, „Domaine Lepovo Chardonnay 2023“, „Luda Mara Vranec 2023“, „Babuna White 2025“, „Luda Mara White Cuvée 2025“, „Alexandria Premium White Cuvée 2025“, „Smederevka 2025“, како и „Barovo Red“ од бербите 2021 и 2022 година.
Од ВВ „Тиквеш“ истакнуваат дека резултатите од „Decanter World Wine Awards 2026“ претставуваат значајна потврда за стратешката посветеност кон врвниот квалитет и иновациите во производството, како и продолжение на успешната традиција на освојување престижни меѓународни признанија.
Годинашното издание на „Decanter World Wine Awards“ собра 245 реномирани вински експерти од целиот свет, меѓу кои 63 носители на титулата „Master of Wine“ и 24 „Master Sommelier“. Оценувањето се одвиваше преку повеќестепен процес на слепо дегустирање, што на натпреварот му обезбедува висок кредибилитет и репутација во светската винска индустрија.
Медалите од „Decanter“ се сметаат за едни од највреднуваните признанија во винскиот сектор и претставуваат важна референца за потрошувачите, дистрибутерите и трговските синџири ширум светот. Истовремено, успехот на „Тиквеш“ придонесува за натамошно јакнење на угледот на македонското вино и за афирмација на Северна Македонија како препознатлива винска дестинација на глобалната винска мапа.
