Диант Рамај повторно е голман на Копенхаген. Германскиот чувар на мрежата пристигна на едногодишна позајмица од Борусија Дортмунд, а данскиот клуб има и опција за откуп на неговиот договор по завршувањето на сезоната 2026/27.
За 24-годишниот Рамај ова е враќање на „Паркен“, каде што веќе настапуваше во пролетниот дел од сезоната 2024/25. Тогаш запиша 19 настапи и дури 10 пати ја сочува мрежата, помагајќи му на Копенхаген да ја освои двојната круна – шампионската титула и Купот.
Рамај доаѓа по повредата на хрватскиот репрезентативец Доминик Котарски, кој требаше да замине на позајмица во Динамо Загреб. Котарски се повреди на натпреварот против Рандерс, по што мораше да ја напушти играта поради болки во коленото.
Од Копенхаген веднаш реагираа и го договорија враќањето на Рамај.
Спортскиот директор Кристијан Спикман истакна дека клубот добро ги познава квалитетите на голманот и верува дека неговото искуство ќе биде значајно за тимот.
Тренерот Бо Свенсон, пак, оцени дека Рамај одлично се вклопува во стилот на игра на Копенхаген, особено поради сигурноста со топката и способноста да учествува во изградбата на нападите.
Бидејќи добро ги познава клубот, соиграчите и системот на игра, Рамај би требало веднаш да се стави во функција на тимот.
