Симеон Михаилов, кој во Македонија е правосилно осуден на 12,5 години затвор и се бара со меѓународна потерница, се појави во живо на бугарска телевизија додека протестираше пред македонската амбасада во Софија.
Михаилов е осуден во случајот „Детонатор“ за обид за убиство на Драганчо Стоименов – Дацо Белски, поранешен телохранител на Сашо Мијалков. Според судските пресуди, тој бил дел од злосторничко здружување и учествувал во активности насочени кон напад врз Стоименов.
Неговото појавување во Бугарија предизвика реакции бидејќи македонските власти го бараат за издржување на затворската казна. Од Министерството за внатрешни работи велат дека постапката за екстрадиција не е започната бидејќи од бугарските власти немаат добиено известување дека Михаилов е лоциран или лишен од слобода.
Премиерот Христијан Мицкоски побара Бугарија да го предаде Михаилов, посочувајќи дека Македонија и Бугарија се партнери во НАТО и очекува лицата барани со потерница да бидат предадени за да се соочат со правдата.
Случајот повторно го отвори прашањето за можностите за екстрадиција на македонски државјани кои поседуваат и бугарско државјанство.
