Голема полициска акција насочена кон сузбивање на нелегалната трговија со лекови и медицински производи се спроведуваше на повеќе локации во земјава, при што досега се приведени најмалку шест лица. Претреси биле извршени во Скопје, Тетово и Гевгелија, а случајот е поврзан со сомневања за криумчарење и нелегална трговија со различни медицински производи и суплементи.
Министерот за здравство Сашо Клековски откри дека во центарот на истрагата се наоѓаат суплементи и препарати наменети за подобрување на потенцијата, кои, според неговите информации, не биле регистрирани во Македонија за таквата намена.
Клековски појасни дека не станува збор за регистрирани лекови, туку за додатоци и производи со различни билни состојки, кои се продавале со наводни својства за подобрување на машката потенција и функционирањето на одредени органи. Според него, ваквите производи се надвор од законската рамка доколку не се регистрирани за употребата за која се рекламираат.
Министерот предупреди дека проблемот не е само во евентуалната финансиска штета за граѓаните кои ги купуваат ваквите производи, туку и во можните здравствени последици од употребата на нерегистрирани препарати. Тој нагласи дека акцијата е дел од пошироки активности за сузбивање на шверцот и нелегалната трговија со лекови, суплементи и други медицински средства.
Според досегашните информации, полициските активности се спроведуваат под раководство на јавен обвинител од Основното јавно обвинителство за гонење на организиран криминал и корупција, а во акцијата учествува Одделот за сузбивање на организиран криминал при МВР.
Меѓу приведените, според медиумски информации, има и припадник на Царинската управа, кој се сомничи дека бил во комуникација со лица опфатени со истрагата. Случајот вклучува сомневања и за други коруптивни кривични дела, но истрагата сè уште е во тек.
Надлежните институции продолжуваат со проверките и претресите, а повеќе детали за опфатот на истрагата и евентуалните обвиненија се очекуваат по завршувањето на полициските активности.
