Дијалогот меѓу Северна Македонија и Бугарија продолжува, но разликите во ставовите околу европската интеграција и натаму остануваат значајни. По средбата во Софија меѓу министрите за надворешни работи Тимчо Муцунски и Велислава Петрова-Чамова, од бугарска страна беше повторено дека условите за напредок на земјава кон Европската Унија не се променети и дека се очекува исполнување на преземените обврски.
Петрова-Чамова порача дека Софија продолжува да го поддржува европскиот пат на Северна Македонија, но очекува реализација на договореното во 2022 година, вклучително и уставните измени и останатите елементи од тогашниот договорен процес.
Според неа, токму конкретното исполнување на преземените обврски е основа за градење поголема доверба меѓу двете земји. Таа нагласи дека Бугарија нема дополнителни барања надвор од договореното и дека комуникацијата меѓу Софија и Скопје треба да продолжи.
Муцунски, пак, оцени дека разговорите биле конструктивни, иако не донеле решение за најважните отворени прашања. Тој призна дека ставовите на двете страни и понатаму се значително оддалечени, но потенцира дека е важно дијалогот да не биде прекинат.
Македонскиот министер за надворешни работи порача дека Северна Македонија сака процесот на европска интеграција да се темели на заслуги и конкретни резултати, а не постојано да биде оптоварен со историски и билатерални спорови.
Тој истакна дека земјава е целосно усогласена со Заедничката надворешна и безбедносна политика на ЕУ и дека ќе продолжи да работи на исполнување на своите задачи. Според него, Северна Македонија е подготвена да биде конструктивна и да бара решенија, но процесот не може да зависи само од една страна.
Во разговорите било отворено и прашањето за акцискиот план поврзан со малцинствата. Двете страни се согласиле комуникацијата да продолжи, но Муцунски нагласи дека деталите од билатералните разговори не треба веднаш да се објавуваат, бидејќи довербата се гради постепено и преку доследност.
Во Софија било разговарано и за случајот со Ива Михајлова од Кочани, која е обвинета во врска со тешка сообраќајна несреќа од октомври 2025 година. Михајлова, која има македонско и бугарско државјанство, по несреќата беше повредена и побара лекување во Бугарија.
Муцунски посочи дека треба да се одвојат правниот и здравствениот аспект на случајот. Тој нагласи дека извршната власт не може да влијае врз судските одлуки, додека во однос на здравствената состојба треба да се обезбеди соодветен медицински третман.
Како можност за дополнително уверување во здравствената грижа, македонската страна предложила бугарски медицински тимови да ја посетат Михајлова и да се запознаат со третманот што го добива. Петрова-Чамова ја поздравила оваа можност и случајот го оценила пред сè како хуманитарно прашање.
Една од централните теми на министерската конференција во Софија бил и Коридорот 8. Муцунски нагласил дека инфраструктурното поврзување со соседите не е само економско прашање, туку има и пошироко европско и безбедносно значење.
Според него, Коридорот 8 може да стане важна врска меѓу земјите од регионот и да отвори можности за развој на транспортот, трговијата, енергетиката, дигиталната инфраструктура и инвестициите.
Тој информираше дека продолжуваат активностите околу патната и железничката инфраструктура, а Северна Македонија и Бугарија веќе работат на прашањата поврзани со прекуграничниот железнички тунел.
Муцунски потврди и дека Северна Македонија е подготвена да биде домаќин на следниот министерски состанок посветен на Коридорот 8.
Од Европската комисија, пак, беше испратена порака дека градењето доверба и практичната соработка се од особено значење. Коридорот 8 беше посочен како пример дека конкретните европски проекти можат да придонесат за поврзување на државите и создавање услови за поширока соработка.
И покрај различните позиции околу европската интеграција, историјата и билатералните прашања, од двете страни е потврдено дека комуникацијата треба да продолжи. Софија инсистира на исполнување на преземените обврски, додека Скопје бара европскиот пат да се оценува преку резултатите и напредокот што земјата ги постигнува.
