Во Македонија досега се регистрирани вкупно 53 лица кои заболеле од западнонилска треска, од кои 50 се лабораториски потврдени, додека кај уште три лица се чекаат дополнителни резултати. Податоците ги соопшти министерот за здравство Сашо Клековски.
Кај најголемиот дел од пациентите болеста предизвикала нервно-инвазивна форма. Од вкупно 53 случаи, 52 пациенти ја развиле оваа потешка форма, додека кај еден пациент не била утврдена нервно-инвазивна форма.
На Клиниката за инфективни болести во Скопје досега биле третирани 51 пациент со нервно-инвазивна форма. Од нив, 25 лица се опоравиле и се пуштени на домашно лекување.
Во моментов на клиниката остануваат 21 хоспитализиран пациент. Кај 18 од нив инфекцијата е лабораториски потврдена, додека за тројца пациенти резултатите сè уште се очекуваат. Шест лица се на интензивно лекување.
За жал, во досегашниот тек на епидемиолошката состојба се регистрирани и пет смртни случаи поврзани со западнонилската треска.
Добри вести има кај помладите пациенти. Најмладата пациентка, која е од Студеничани, по лекувањето е отпуштена од болница. Се очекува наскоро дома да биде пуштен и најмладиот машки пациент, 26-годишник од Зелениково.
