Киев во текот на ноќта беше цел на нов масовен руски воздушен напад, при што врз украинската престолнина беа лансирани десетици дронови и ракети. Во повеќе делови од градот избувнаа големи пожари, а оштетени се станбени згради и цивилна инфраструктура.
Според украинските власти, противвоздушната одбрана успеала да пресретне дел од проектилите, но паднати остатоци и директни погодоци предизвикале силни експлозии и пожари во неколку населби. Спасувачките екипи цела ноќ интервенирале на повеќе локации, додека пожарникарите се бореле со огнените стихии што зафатиле станбени објекти.
Во нападот има загинати и десетици повредени, меѓу кои и деца, а дел од жителите останале заробени под урнатините на оштетените згради. Локалните власти соопштија дека спасувачките операции продолжуваат и дека бројот на жртвите може дополнително да се зголеми.
Очевидци сведочат дека сирените за воздушна опасност се огласиле во текот на ноќта, по што низ градот одекнувале силни детонации. Густ чад се издигал над неколку квартови, додека голем број граѓани засолниште побарале во метро-станиците и подземните засолништа.
Украинскиот претседател Володимир Зеленски го осуди нападот и повторно побара поголема поддршка од западните сојузници, особено во делот на системите за противвоздушна одбрана. Во меѓувреме, борбите продолжуваат и на другите фронтови, додека воздушните напади меѓу двете завојувани страни стануваат сè поинтензивни.
