Тензична ситуација се случила во украинското село Петропавливска Боршчахивка, во близина на Киев, каде што група граѓани се собрале пред објект во кој биле сместени припадници на Националната гарда. Повод за протестот биле сомнежите дека војници биле незаконски задржувани и малтретирани.
Од Националната гарда соопштија дека станува збор за непроверени информации. Во објектот имало неодамна мобилизирани војници, како и лица кои ја напуштиле својата единица без дозвола и чекале да бидат распоредени во други состави. Четворица војници биле повредени и пренесени на лекарски преглед, но властите потврдија дека нема загинати.
Ситуацијата ескалирала кога дел од насобраните почнале да фрлаат јајца кон полицајците и припадниците на Националната гарда, а потоа се обиделе насилно да влезат во објектот. Според извештаите од местото на настанот, безбедносните сили употребиле солзавец и испукале предупредувачки истрели во воздух.
Полицијата соопшти дека интервенирала по пријава од вработен во приватна итна медицинска помош, на кого му бил оневозможен пристап до лице во објектот. На местото пристигнал и автобус со кој требало да бидат пренесени дел од задржаните лица.
Во текот на вечерта пристигнал и шефот на кабинетот на украинскиот претседател, Кирило Буданов, кој изјавил дека дошол лично да утврди што се случува. Според неговите информации, во објектот се наоѓале 14 припадници на војската, а обидите за транспорт на повредените биле отежнати поради блокадата од демонстрантите.
Украинската воена правобранителка Олха Решетилова потврди дека сите војници се безбедни и дека им се укажува медицинска помош. Надлежните институции најавија истрага за утврдување дали во објектот имало незаконски постапки и кој ќе сноси одговорност.
