Неизвесност владее во Пакистан откако товарен авион со петчлен екипаж исчезна од радарите за време на лет кон Карачи. Според првичните информации, пилотите пријавиле технички проблем со навигациската опрема непосредно пред да биде изгубена комуникацијата со контролата на летање.
Надлежните воздухопловни служби соопштија дека последниот контакт со авионот бил воспоставен додека летал над Арапското Море. Неколку минути подоцна леталото исчезнало од радарите, по што веднаш била активирана спасувачка операција.
Првичните податоци од системите за следење на летови укажуваат дека авионот нагло ја губел висината пред целосно да исчезне од евиденцијата. Експертите оценуваат дека таквото движење е невообичаено и може да укажува на сериозен технички дефект, но нагласуваат дека е прерано да се извлекуваат заклучоци додека не заврши официјалната истрага.
Во потрагата по авионот се вклучени повеќе државни институции, а спасувачките екипи со бродови и воздухоплови пребаруваат пошироко морско подрачје каде што се претпоставува дека се случила несреќата.
Компанијата K2 Airways, која управувала со леталото, соопшти дека е во постојана координација со пакистанските власти и дека целосно ја поддржува спасувачката операција. Од таму изразија надеж дека екипажот ќе биде пронајден што е можно поскоро.
Станува збор за товарен авион Boeing 737, кој бил стар околу три децении и од минатата година бил дел од флотата на превозникот. Засега нема официјална потврда дали авионот се урнал, а истрагата треба да ги утврди точните околности под кои исчезнал од радарите.
