Баерн Минхен е на добар пат да ја реши една од најважните задачи околу составот за следните сезони – да го задржи Хари Кејн. Англискиот напаѓач е задоволен од престојот во Германија, а преговорите со раководството на баварскиот клуб влегле во завршна фаза. Доколку не се појават непредвидени пречки, продолжувањето на соработката би можело да биде официјализирано уште во наредните денови.
Кејн за својата иднина зборуваше пред новинарите во пресрет на дуелот со Атлетико Мадрид. Тој потврди дека двете страни постигнале значителен напредок во разговорите и дека остануваат да се усогласат само неколку детали, меѓу кои и периодот за кој ќе важи новиот договор.
„Мислам дека е прашање на денови. Имавме добри разговори во текот на викендот. Знам дека постојано велам дека сме блиску, но сега навистина сме многу блиску“, изјави англискиот голгетер.
Сегашната обврска на Кејн со Баерн завршува на 30 јуни, а клубот веќе неколку месеци работи на неговото задржување. Во Минхен очигледно немаат намера да се откажат од фудбалерот кој стана една од централните фигури во тимот.
Англичанецот пристигна во Германија во летото 2023 година, по заминувањето од Тотенхем. Иако преминот во странство претставуваше голема промена, Кејн смета дека одлуката да ја напушти Англија била вистински потег за неговата кариера и приватниот живот.
Тој откри дека можел да избере побезбедна опција и да остане во познатата средина, но наместо тоа решил да прифати нов предизвик и да се испроба во една од најсилните европски лиги.
„Преселбата во Баерн беше голем чекор во мојата кариера. Ќе ми беше лесно да останам во комфорна средина до крајот на кариерата, знаејќи дека секогаш ќе играм. Но, сакав да се предизвикам себеси и да напредувам.
Баерн Минхен ми го промени животот, и на теренот и надвор од него. Преселбата во друга земја со моето семејство и начинот на кој бевме пречекани беа навистина неверојатни. Искрено, многу сум среќен што го направив тој чекор“, истакна Кејн.
Продолжувањето на договорот би значело дека Баерн ќе ја задржи својата главна напаѓачка опција и во наредниот период. За Кејн, пак, тоа би било потврда дека Минхен останува неговата посакувана фудбалска средина и покрај интересот и шпекулациите за неговата иднина.
