Пензионерите од Општина Аеродром ќе добијат можност бесплатно да се рекреираат, да бидат физички активни и да поминуваат повеќе време во дружење преку организирани тренинзи по Микс Аеробик, наменети за лицата во третата доба.
Преку оваа иницијатива, локалната самоуправа има цел да ги поттикне повозрасните граѓани да водат поактивен живот, да се грижат за своето здравје и да ги искористат придобивките од редовното движење. Освен физичката активност, програмата нуди и можност за социјализација, размена на искуства и поминување квалитетно време во пријатна атмосфера.
Вежбите ќе бидат со низок до умерен интензитет и приспособени на физичките можности и подготвеноста на учесниците. Посебно внимание ќе се посвети на правилното изведување на движењата и безбедноста за време на тренинзите.
Активностите ќе ги спроведува Лазар Иванов, професор по физичко и здравствено образование од „Микс Аеробик“, во соработка со Здружението на пензионери „Солидарност“ од Аеродром.
Од Општината нагласуваат дека поддршката за здравјето и активниот живот на повозрасните граѓани е важен дел од нивните активности, со цел пензионерите да имаат повеќе можности за рекреација, создавање здрави навики и дружење.
За учество се препорачува лицата да бидат психофизички способни за ваков вид активност и да немаат лекарска забрана за вежбање. Оние што имаат хронични заболувања, здравствени проблеми или физички ограничувања треба претходно да се консултираат со лекар.
За дополнителни информации и пријавување, заинтересираните пензионери можат да се јават на телефонскиот број 078 441 235, кај професорот Лазар Иванов.
