Кога се подготвувал наследникот на легендарниот Bugatti Chiron, во групацијата Volkswagen постоела идеја новиот модел да биде целосно електричен. Но, Мате Римац имал поинаква визија за иднината на францускиот производител. Наместо хиперавтомобил кој се движи исклучиво на струја, тој се заложил за комбинација од моќен атмосферски мотор со 16 цилиндри и електричен погон.
Римац сметал дека целосно електричен модел не би бил најдобриот избор за главниот автомобил на Bugatti. Искуството со електричната Nevera му покажало дека, и покрај импресивните перформанси, пазарот за ултраскапи електрични хиперавтомобили е ограничен. Купувачите во овој сегмент не бараат само брзина, туку и карактер, ексклузивност и посебно возачко искуство.
Кога во 2021 година Римац, заедно со Porsche, ја презеде контролата врз Bugatti, Volkswagen групацијата силно се насочуваше кон електрификација. Електричен наследник на Chiron на прв поглед се вклопувал во таа стратегија, особено поради знаењето на Римац во развојот на електрични погонски системи со високи перформанси. Сепак, тој одлучил да тргне по потежок, но според него посоодветен пат.
Римац објаснил дека наједноставно решение би било да се искористи платформата на Nevera и врз неа да се постави знакот на Bugatti. Тоа би го скратило развојот и би ги намалило техничките предизвици. Наместо таков пристап, тој инсистирал на целосно нов автомобил со сопствен идентитет, кој нема да биде само поинаква верзија на електричниот модел на неговата компанија.
Резултатот е Bugatti Tourbillon, хиперавтомобил што комбинира електрична технологија со атмосферски V16 мотор развиен во соработка со Cosworth. Според Римац, реакциите на пазарот кон Nevera биле важен сигнал дека најбогатите купувачи не сакаат нужно секој нов автомобил да биде електричен, без оглед на неговите перформанси.
Nevera, со моќност од 1.914 коњски сили, покажа колку далеку може да оди електричниот погон. Но, комерцијалниот резултат не ги достигнал првичните очекувања. Римац неодамна објави дека биле продадени 71 примерок од моделот, иако првично бил планиран производствен тираж од 150 автомобили.
Ова искуство дополнително ја зацврстило неговата одлука Bugatti да не се откаже од моторите со внатрешно согорување. Додека Nevera е демонстрација на моќта и можностите на електричната технологија, Tourbillon нуди поинаква комбинација – електрификација, механичка сложеност и звук на шеснаесетцилиндричен мотор.
Изгледа дека стратегијата одговара на очекувањата на клиентите. Сите 250 планирани примероци на Tourbillon веќе се резервирани, што претставува значаен показател за интересот кон новиот модел. За купувачите во овој ценовен сегмент, автомобилот не е само средство за постигнување рекордни забрзувања, туку и симбол на престиж и инженерска уникатност.
Римац најавува и амбициозни планови за Bugatti во следните десет години. Тој вели дека компанијата има јасна претстава за идните модели и дека независноста во донесувањето одлуки ќе ѝ овозможи да развива автомобили според сопствената визија. Според него, станува збор за проекти што треба да претставуваат вистински уметнички дела на тркала.
Во иднина, Bugatti би можел да ја прошири понудата и надвор од најскапите хиперавтомобили. Како една од можностите се споменува луксузен гран турер со повеќе практичност, инспириран од некогашниот концепт Galibier со пет врати. Засега нема потврдени детали за таков сериски модел, но најавите отвораат простор за различни насоки во развојот на брендот.
Во меѓувреме, Porsche веќе се повлече од сопственичката структура на Bugatti Rimac и Rimac Group, откако на почетокот на септември ги продаде своите удели. Со тоа, Римац добива поголема слобода во планирањето на иднината на компанијата и развојот на нови модели.
Одлуката да се задржи V16 моторот покажува дека, барем во најексклузивниот дел од автомобилската индустрија, електрификацијата не мора да значи целосно исчезнување на традиционалните мотори. За Римац, иднината на Bugatti е во спојувањето на двете технологии, а не во целосното откажување од една во корист на другата.
