Завршницата на сезоната во Формула 1 е доведена во неизвесност поради воениот конфликт на Блискиот Исток, во кој е вклучен Иран. Поради безбедносната состојба во регионот, под знак прашалник е одржувањето на последните две трки во шампионатот – Големата награда на Катар, закажана за 29 ноември, и трката во Абу Даби една недела подоцна.
Како можна замена за овие натпреварувања се разгледува италијанската патека Имола, каде што Формула 1 би можела да организира трка во декември.
Според информациите на неколку специјализирани медиуми, организаторите во италијанскиот регион Емилија-Ромања треба најдоцна до следниот вторник да добијат официјална потврда дали ќе ја преземат организацијата. По истекот на овој рок, логистичките ограничувања би можеле да го оневозможат навременото подготвување на настанот.
Овој рок го потврдил и Ајао Комацу, шефот на тимот Хас, според информациите што ги пренесува ЕСПН.
Постои и можност сезоната да заврши порано од планираното. Доколку конфликтот дополнително ескалира и безбедносните услови не дозволат одржување на трките ниту во Катар и Абу Даби, ниту организирање заменска трка во Имола, последното натпреварување би можело да биде Големата награда на Лас Вегас, закажана за 21 ноември.
Сепак, ваквото сценарио би создало проблеми и за финансиското планирање на тимовите. Формула 1 се обврзала на календар со најмалку 22 трки, а токму врз таа бројка е заснован и дел од финансискиот план на екипите.
Засега останува неизвесно дали завршницата ќе се одржи според првичниот календар или раководството на Формула 1 ќе мора да направи сериозни измени поради безбедносната состојба во регионот.
