Германија во наредните денови би можела да објави конкретни мерки како одговор на сериозниот инцидент со дронови на аеродромот Лајпциг/Хале, најави германскиот канцелар Фридрих Мерц.
Тој изјави дека истрагата е при крај и дека германската влада веќе постигнала согласност околу начинот на кој ќе реагира. Според Мерц, мерките се координираат со Европската унија и со сојузниците во НАТО.
Германските медиуми пишуваат дека Берлин разгледува нови санкции против руски субјекти, но и можност за дополнително зголемување на воената помош за Украина.
Инцидентот на аеродромот, според новите информации, можел да биде посериозен од првичните проценки. Дронот наводно бил опремен со експлозив, а истражителите се сомневаат дека во операцијата можеле да бидат вклучени повеќе беспилотни летала.
Дополнителна загриженост во Берлин предизвикало и откривањето на подземно складиште со оружје и муниција во близина на германската престолнина. Федералните власти проверуваат дали складиштето е поврзано со подготовки за активности насочени против државата.
Германските безбедносни служби, според медиумските информации, разгледуваат и можноста оружјето да било наменето за руски оперативци. Станува збор за сериозни сомнежи кои сè уште се предмет на истрага.
Од германската влада засега не откриваат детали за конечната одлука. Официјалната проценка за одговорноста за инцидентот ќе биде објавена откако ќе заврши истрагата.
Москва во минатото ги отфрлаше западните обвинувања за вмешаност во саботажи, шпионажа и други операции во европските држави.
