Еден од најпознатите шутери во историјата на НБА, Клеј Томпсон, е пред нова промена во кариерата. Четирикратниот шампион се договорил со Далас Маверикс за прекин на соработката, по што според информациите од американските кошаркарски извори треба да го засили Мајами Хит.
Томпсон ќе стане слободен агент откако ќе биде завршена формалната процедура за откуп на неговиот договор. Во Мајами од него се очекува да донесе огромно искуство, но пред сè дополнителна опасност од линијата за три поени.
Неговата улога во новиот тим би била поврзана со отворање простор за најголемите ѕвезди на составот, предводени од Џанис Адетокунбо и Бам Адебајо. Искусниот бек со своето присуство би требало да му даде на Мајами уште една сериозна опција во нападот.
Томпсон во Далас помина две сезони, но периодот во Тексас не се одвиваше според очекувањата. Минатата сезона просечно постигнуваше 11,7 поени и 2,1 скок по натпревар, додека во двете сезони со Маверикс имаше просек од 12,9 поени со 39 проценти реализација за три поени.
Пред Далас, Томпсон цели 13 сезони го носеше дресот на Голден Стејт Вориорс, со кој освои четири шампионски титули. Заедно со Стеф Кари и Дрејмонд Грин беше дел од една од најуспешните ери во историјата на франшизата.
Кариерата на Томпсон беше обележана и со сериозни повреди, поради кои пропушти две целосни сезони. Сепак, тој успеа да се врати на теренот и повторно да биде важен дел од НБА тимовите.
Во кариерата има просек од 19,6 поени по натпревар и 41 процент реализација за три поени. Со 2.899 погодени тројки, Томпсон се наоѓа на четвртото место на вечната листа во НБА, зад Стеф Кари, Џејмс Харден и Реј Ален.
Преминот во Мајами би можел да биде нова можност за Томпсон да се врати во центарот на шампионската борба и со своето искуство и шутерски квалитети да му помогне на Хит во походот кон највисоките цели.
