Големи пожари зафатија делови од хрватското крајбрежје во близина на Локва Рогозница и Омиш, при што има загинато лице и десетици повредени.
Според досегашните информации, 42 лица се повредени, а 14 од нив се задржани во болница. Седум пациенти се во тешка состојба, додека четворица се префрлени на лекување во специјализирани болници во Загреб.
Поради брзото ширење на огнот, властите евакуирале повеќе од 1.000 жители и туристи од загрозените подрачја. Меѓу евакуираните има и странски туристи.
Пожарот зафатил куќи, автомобили и друг имот, а густ чад се проширил над крајбрежните населби. Пожарникарските екипи продолжуваат со интервенциите и со напорите да го стават огнот под контрола.
Високите температури, сувата вегетација и силниот ветер дополнително го отежнуваат гаснењето и го зголемуваат ризикот од ширење на пожарот.
