Поранешната прва дама на Јужна Кореја, Ким Кон Хи, доби намалена затворска казна по одлуката на Апелацискиот суд во Сеул. Наместо седум години затвор, колку што и беше изречено на првостепената постапка, таа сега е осудена на пет години затвор.
Судот делумно ја преиначи првостепената пресуда и ја ослободи Ким од дел од обвиненијата. Меѓу нив е и случајот со луксузниот часовник „Вашерон Константин“, за кој Апелацискиот суд оценил дека обвинителството не обезбедило доволно докази оти часовникот бил даден во замена за конкретна услуга.
Сепак, судот ги потврди повеќето останати точки од пресудата. Ким е прогласена за виновна во случаи поврзани со примање скап накит, чанта „Диор“, златна фигура на желка и уметничка слика, при што обвинителството тврдеше дека подароците биле поврзани со барања за влијание врз државни функции и именувања.
Покрај затворската казна, судот наредил и одземање на дел од предметите, како и конфискација на 24,4 милиони вони. Во првостепената постапка, износот за конфискација бил 64,8 милиони вони.
Адвокатскиот тим на Ким најави дека ќе поднесе жалба до Врховниот суд, со став дека и преостанатите обвиненија не се доволно поткрепени со докази. И обвинителството најави дека ќе ја разгледа одлуката на Апелацискиот суд пред да одлучи за понатамошните правни чекори.
Случајот е дел од пошироките судски постапки поврзани со поранешната прва дама и нејзиниот сопруг, поранешниот претседател Јун Сук Јеол. Пресудата од 22 септември сè уште не е конечна, бидејќи страните имаат можност да побараат разгледување пред највисокиот суд во земјата.
