Победата на Португалија од 2:1 против Норвешка во Осло донесе интересна ситуација околу најголемата ѕвезда на тимот. Кристијано Роналдо целиот натпревар го проследи од клупата, а по завршувањето селекторот Жорже Жезус објасни зошто капитенот не доби минутажа.
Жезус беше задоволен од начинот на кој Португалија стигна до трите бода и ја пофали Норвешка за квалитетот и тактичката поставеност.
„Да победите во Осло против Норвешка значи дека сте одиграле одличен натпревар. Тие се многу квалитетен тим и одлично го затвораат просторот“, изјави португалскиот селектор.
Тој откри дека планот првично бил Роналдо да влезе во игра во второто полувреме, но развојот на натпреварот го променил неговото мислење.
„Роналдо денеска не играше затоа што натпреварот се развиваше во друга насока. Планирав да го внесам, но проценив дека моментот не е соодветен. Тоа не значи дека нема да игра против Данска“, објасни Жезус.
Селекторот додаде дека ниту голот на Гонзало Рамос не значи дека тој автоматски ќе биде стартер на следниот натпревар. Според него, изборот на составот зависи од тактиката и потребите на секој конкретен противник.
По натпреварот се појавија и прашања зошто Роналдо не им се придружил на соиграчите во поздравувањето на навивачите.
„Не го забележав тоа. Ако навистина се случило, само тој може да објасни зошто. Јас и понатаму сметам на него“, рече Жезус.
Португалскиот селектор потврди дека планира разговор со капитенот.
„Добро го познавам и секако ќе разговарам со него. Репрезентацијата е различна од клубот. Сите сме заедно, а тој е капитен на тимот“, порача Жезус.
Тој нагласи дека засега не може да знае што точно мислел Роналдо по натпреварот и дека тоа ќе го дознае дури по разговорот со него.
