Изградбата на големи дата-центри во руралните делови на Тексас се најде во фокусот на политичката дебата, откако новоизбраната гувернерка Џина Хинохоса најави дека ќе бара законски мерки за заштита на локалното население од последиците на ваквите инвестиции.
Хинохоса, која на изборите во вторникот го победи досегашниот републикански гувернер Грег Абот, смета дека развојот на дата-центрите се одвива без доволно правила што би ги штителе жителите на заедниците во кои се градат овие објекти.
Тексас во изминатиот период стана една од најзначајните дестинации за вакви инвестиции, благодарение на достапните енергетски ресурси, релативно евтиното земјиште и деловната политика насочена кон привлекување компании. Но, брзото ширење на инфраструктурата за обработка и складирање податоци предизвикува сè поголема загриженост кај локалното население.
Во интервју за Си-Ен-Ен, Хинохоса најави дека ќе предложи законски решенија со кои жителите ќе добијат поголема заштита, а локалните заедници ќе можат да влијаат врз одлуките за изградба и работење на дата-центрите. Таа смета дека додека не се воспостават соодветни правила, треба да се запре започнувањето нови проекти.
Противниците на ваквите инвестиции предупредуваат дека големите дата-центри трошат огромни количества електрична енергија и вода, можат да влијаат врз природната средина и да создадат дополнителен притисок врз локалната инфраструктура. Загриженост постои и околу пристапот на јавноста до земјиштето во државна сопственост.
Администрацијата на американскиот претседател Доналд Трамп, од друга страна, го поддржува проширувањето на дата-центрите и го третира како национален приоритет, особено поради нивната улога во развојот на вештачката интелигенција и дигиталната економија.
И досегашниот гувернер Абот презеде мерки поврзани со енергетските потреби на овие објекти. Тој нареди запирање на приклучувањето нови дата-центри на државната електроенергетска мрежа и се заложи за сеопфатна проверка на проектите.
Изборната победа на Хинохоса отвора и прашања за иднината на инвестициите поврзани со милијардерот Илон Маск. Неговите компании „СпејсЕкс“ и „Тесла“ имаат седиште во Тексас, а таму се разгледува и можноста за започнување проект за производство на чипови.
Маск за време на изборната кампања го поддржа Абот, а значителни средства вложи и во поддршка на републиканскиот кандидат за Сенатот Кен Пакстон. Хинохоса, сепак, порача дека не ја исклучува соработката со Маск и неговите компании, но дека таа ќе мора да се одвива според условите што ќе ги постави нејзината администрација.
Дополнителни реакции предизвика и информацијата објавена во октомври од списанието „Тексас Мантли“, според која државата разгледувала можност за продажба на државниот парк Бока Чика на компанијата „СпејсЕкс“.
На прес-конференција Хинохоса потврди дека разговарала со директорот на Тексашката комисија за паркови и диви животни и побарала да не се преземаат никакви чекори во врска со ова прашање додека трае преносот на власта од досегашната администрација.
