Управата за јавни приходи го тестира новиот систем за електронски фактури, со кој компаниите во иднина ќе можат дигитално да ги испраќаат и примаат фактурите директно преку системот на УЈП.
Фактурите ќе се креираат преку ERP или сметководствените системи на компаниите, а фирмите без сопствено софтверско решение ќе можат да користат бесплатна веб или клиентска апликација. Предвидена е и мобилна апликација за преглед на издадените и примените документи.
По електронското доставување, системот автоматски ќе ги проверува податоците, а по успешната валидација фактурата ќе добива единствен електронски идентификатор – еИФ. Само електронската фактура со доделен еИФ ќе има правна важност.
Новина е и задолжителното користење даночен индикатор, преку кој системот ќе го препознава даночниот третман на секоја трансакција и ќе се намалува можноста за грешки при фактурирањето.
Тестирањето започна на почетокот на годинава и опфаќа поврзување на компаниите и софтверските решенија со системот на УЈП. Од Управата ги повикуваат фирмите да се вклучат во пилот-фазата и со свои забелешки да придонесат за подобрување на системот.
