Додека најголемиот дел од градот мирува, градежните екипи работат на една од позначајните сообраќајни точки во источниот дел на Скопје. Во ноќните часови се одвива асфалтирањето на мостот „Естакада“ во Гази Баба, со цел работите да се завршат со што помало влијание врз дневниот сообраќај.
За активностите на терен информираше скопскиот градоначалник Орце Ѓорѓиевски, кој заедно со градоначалникот на Гази Баба, Бобан Стефковски, извршил увид во работите.
Санацијата опфаќа вкупно 10.000 квадратни метри пристапни рампи и коловозни површини. Од нив, околу 3.800 квадратни метри се обработуваат со отстранување на стариот слој и поставување два нови слоја асфалт.
На самиот мост се поставува нов асфалтен слој, а целокупниот зафат опфаќа коловоз во должина од околу 1,5 километри.
Како дел од реконструкцијата се поставуваат и нови рабници и тротоари, а предвидено е и обновување на заштитната пешачка ограда. Ќе бидат заменети и дел од капаците на шахтите.
Од Градот Скопје велат дека работата во текот на ноќта е избрана за да се избегнат дополнителни сообраќајни застои во периодите кога улиците се најоптоварени.
Ѓорѓиевски најави дека ваквиот начин на изведување на градежните работи ќе се применува и на други локации каде што условите го дозволуваат тоа, со цел да се намали влијанието врз секојдневното движење на граѓаните.
„Естакада“ е важна сообраќајна врска за жителите на овој дел од Скопје и за возилата што секојдневно го користат овој правец. Од Градот најавуваат дека санацијата на мостовите во Скопје ќе продолжи и на други локации каде што ќе биде утврдена потреба за интервенција.
