Американскиот Пентагон веќе подготвува план за значително помали воени трошоци од рекордните 1,5 билиони долари што ги побара претседателот Доналд Трамп. Иако Белата куќа јавно инсистира на целосно финансирање на амбициозната воена програма, зад затворени врати се разгледува буџет од околу 1,1 билион долари, објави „Политико“, повикувајќи се на четири извори запознаени со разговорите.
Разликата меѓу двата износа достигнува дури 400 милијарди долари. Според информациите, Пентагон и конгресните комисии задолжени за државните расходи веќе работат на алтернативен финансиски план, додека администрацијата на Трамп продолжува јавно да го поддржува првичниот предлог.
Еден од изворите за „Политико“ наведува дека воените претставници не можат јавно да признаат дека се подготвуваат за значително помало финансирање.
„Никој од нив не очекува дека ќе добијат нешто ни приближно до 1,5 билиони долари“, изјавил поранешен американски функционер запознаен со преговорите.
Тој додава дека веќе сериозно се разгледуваат сценарија со пониски средства, бидејќи таквиот исход се смета за многу поверојатен од усвојувањето на целиот финансиски план на Трамп.
Американскиот претседател побара историско зголемување на воените расходи за финансирање на големи стратешки проекти, меѓу кои и новиот противракетен систем „Златна купола“, како и изградба на нови воени бродови.
Главната пречка, сепак, е Конгресот. Планот на Трамп предвидува 1,15 билиони долари преку редовната буџетска процедура и дополнителни 350 милијарди долари преку посебна постапка, која би им овозможила на републиканците да ги одобрат дополнителните средства без поддршка од демократите во Сенатот.
Но, републиканците сè уште немаат договор како да го обезбедат дополнителното финансирање. Преговорите се отежнати и од политичките поделби, несогласувањата околу војната со Иран и сè позатегнатите односи меѓу Пентагон и конгресмените.
„Вашингтон пост“ објави дека разговорите за воениот буџет се во застој токму поради овие несогласувања. Во меѓувреме, според „Политико“, воените претставници веќе анализираат кои програми би имале приоритет доколку Конгресот не го одобри бараниот износ.
Дополнителен притисок врз американските воени финансии создава и конфликтот со Иран. Според податоците на Пентагон, објавени од „Асошиејтед прес“, војната до 16 октомври ги чинела американските даночни обврзници околу 47,1 милијарда долари.
Од таа сума, приближно 29 милијарди долари се однесуваат на надоместување на потрошената муниција, речиси 12 милијарди на воените операции, а околу шест милијарди долари на изгубената воена опрема.
Евентуалното намалување на буџетот би можело да ја забави обновата на американските воени резерви и реализацијата на дел од планираните проекти.
Засега нема конечна одлука за промена на барањето на Трамп. Станува збор за интерни подготовки за можноста Конгресот да не ја одобри рекордната воена потрошувачка, додека Белата куќа продолжува да се залага за првичниот план.
