Случајот што го отвори косовското Специјално обвинителство против политичкиот аналитичар Фатмир Шехоли привлече внимание и во Северна Македонија, откако во обвинителните материјали се појави името на Виктор Петрушевски, поранешен советник на експремиерот Зоран Заев.
Шехоли е обвинет за шпионажа и уцена, а според обвинението, наводно бил регрутиран од српската Безбедносно-информативна агенција (БИА) и собирал информации поврзани со политичките и безбедносните состојби во Косово.
Во материјалите се наведува дека Шехоли и Петрушевски комуницирале преку WhatsApp во декември 2024 година. Според обвинителството, разговорите биле поврзани со организирање средба со Бојан Димиќ, кој истражителите го идентификуваат како службеник на БИА.
Во предметот се споменува и контакт зачуван како „Виктор Македонија“, на кој, според обвинителството, во август 2025 година бил испратен документ со ознака „Top Secret 2“.
Петрушевски ги негира сите наводи за поврзаност со разузнавачки структури. Тој за ТВ Алсат изјавил дека со Шехоли разговарал за политички и економски теми, како и за можности поврзани со бизнис, но дека немал сознанија за негови евентуални активности со српските безбедносни служби.
Според Петрушевски, кога добил контакт од лице од Србија и подоцна дознал дека станува збор за човек кој не бил поврзан со неговите деловни интереси, решил да не воспостави контакт.
Шехоли покрај шпионажа е обвинет и за уцена, при што обвинителството тврди дека побарал повеќе од 13.000 евра. Предметот е пред Основниот суд во Приштина, а првото рочиште е закажано за 7 септември.
