Прашањето за јавните набавки поврзани со изградбата на модуларните болници повторно се најде во фокусот на јавноста, откако Обвинителството за гонење на организиран криминал и корупција одлучи да не продолжи со постапување по предметот. На одлуката реагираше премиерот Христијан Мицкоски, кој ја оцени како скандалозна.
Според Мицкоски, станува збор за случај кој се разгледува со години и кој не треба да биде ставен во втор план, особено поради трагичниот пожар во модуларната болница во Тетово, каде во 2021 година загинаа 14 лица.
Премиерот порача дека одлуката на обвинителството не значи дека прашањето е конечно затворено. Тој смета дека доколку во иднина бидат обезбедени нови информации или докази, предметот повторно може да биде отворен и да продолжи постапувањето.
Мицкоски истакна дека јавноста заслужува целосни одговори за сите околности поврзани со набавките и изградбата на модуларните болници, како и за евентуалната одговорност на лицата кои биле вклучени во процесот.
Тој изрази сомнеж и во одлуката на обвинителот кој, според неговите информации, се наоѓа пред заминување од функцијата. Мицкоски смета дека институциите треба да постапуваат темелно и без политички влијанија, особено кога станува збор за случај со трагичен исход.
Премиерот повтори дека евентуалното појавување на нови докази би можело повторно да го стави предметот во постапка.
„Секогаш може да се појават нови детали кои се поврзани со овој процес и секогаш овој процес може да стане актуелен и да почне од почеток“, порача Мицкоски.
Случајот со модуларните болници останува чувствително прашање, а трагедијата во Тетово и понатаму отвора прашања за начинот на кој биле реализирани набавките, изградбата и контролата на објектите.
