Според соопштението на министерството, дронот се самоуништил околу 10:30 часот по локално време, без последици за населението.Романскиот претседател Никусор Дан го опиша инцидентот како „значаен безбедносен настан“ и рече дека е директна последица од војната што Русија ја започна против Украина.
„Ова бара високо ниво на будност и претпазливост“, напиша Дан на социјалните мрежи.Претседателката на Европската комисија, Урсула фон дер Лајен, исто така оцени дека инцидентот е последица на војната во Украина.
„Тоа сè повеќе станува директна закана за државите на нашата источна граница“, рече таа.
Русија негираше одговорност
Од друга страна, Русија негираше каква било одговорност и тврдеше дека станува збор за украински брод без екипаж.
Руската амбасада во Букурешт објави дека станува збор за „украински беспилотни поморски возила“ и дека обидите за поврзување на инцидентот со Русија се „целосно неосновани“.
По експлозијата, романските власти евакуираа повеќе од 1.000 луѓе од крајбрежната област и испратија два хеликоптери да ја пребараат пошироката област за можни дополнителни уреди.
Жителите и туристите добија предупредувања преку мобилни телефони да избегнуваат зона во радиус од еден километар од местото на инцидентот.
Шефот на романскиот Оддел за вонредни ситуации, Раед Арафат, рече дека сите преземени мерки биле од превентивен карактер.
„Важно е што имавме информации дека дронот ќе експлодира, поради што сите беа безбедни“, изјави претседателот Дан пред новинарите за време на самитот на Европската унија и Западен Балкан во Црна Гора.
НАТО соопшти дека е информиран за инцидентот и дека ги координира активностите со романските власти.
„Продолжуваме тесно да соработуваме со романските власти“, рече претставникот на Алијансата.
Ова е втор сериозен инцидент со дрон во Романија во последните неколку дена. Кон крајот на мај, дрон експлодираше на покривот на станбена зграда во градот Галати, во близина на украинската граница, при што беа повредени мајка и нејзиниот малолетен син.